اسلام آباد۔26جنوری(اے پی پی) وزیر مملکت خارجہ امور حنا ربانی کھر آکھیے جو بھارت نہ کوئی بیک ڈور چینل ڈپلومیسی تھیندی پئی اے تے نہ ہی تجارت دے حوالے نال کوئی مذاکرات تھیندے پئن ۔ سینیٹ اجلاس اچ سوالاں دے وقفے اچ سینیٹر بہرہ مند تنگی، سینیٹر مشتاق احمد، سینیٹر فیصل جاوید دے سوالاں دے جواب اچ انہاں آکھیے جو گزریل چار سالاں اچ پاکستان اتے بھارت دے درمیان تعلقات بھارتی اشتعال انگیز اقدامات دی وجہ توں تعطل دا شکار تھئے ، موجودہ دور حکومت اچ ݙوہیں ملکاں وچال سفارتی تعلقات محدود ہن تے عوام دی سطح تے تبادلہ ٻہوں گھٹ اے۔ انہاں آکھیے تعلقات اچ اڄوکی مشکلات دے باوجود گزریل چار سال اچ ݙو معاہدیں تے دستخط کیتے ڳئن ، انہاں اچ 24 اکتوبر 2019ءکوں کرتارپور راہداری اتے 25 فروری 2021ءکوں ایل او سی تے جنگ بندی دا معاہدہ شامل اے، پاکستان کرتار پور راہداری کھولݨ کیتے بھارت دے نال مفاہمتی یادداشت تے دستخط کیتے، اقوام متحدہ دی طرفوں ایں راہداری کوں امن دی راہداری آکھیا ڳئے، تقریباً پنج ہزار زائرین ہݨ یومیہ بنیاد تے مقدس مقامات دی زیارت کیتے بغیر ویزہ فیس دے پاکستان آندن ۔ انہاں آکھیے ایل او سی تے جنگ بندی معاہدہ دے بعد سرحد پار توں اشتعال انگیزی دے واقعات اچ کمی آئی اے، ایں توں پہلے ݙوہیں ملکاں وچال 2003ءاچ جنگ بندی دے حوالے نال مفاہمت تھئی ہئی جیں دی بھارت 13 ہزار 500 واری خلاف ورزی کیتی جیں دے نتیجے اچ 10 شہری شہید اتے گھٹ توں گھٹ 1600 زخمی تھئے۔ انہاں آکھیے موجودہ حکومت جݙاں توں اقتدار اچ آئی اے، ݙوہیں ملکاں وچال بیک ڈور چینل ڈپلومیسی نی تھیندی پئی تے نہ ہی بھارت دے نال تجارت دے حوالے نال کوئی ڳالھ مہاڑ تھیندی پئی اے ، پاکستان دی خارجہ پالیسی تسلسل تے مبنی اے۔ انہاں سینیٹر بہرہ مند تنگی تے سینیٹر دنیش کمار دے سوالاں دے جواب اچ آکھیے جو پاکستان مذہبی ہم آہنگی دے ودھارے کیتے کوشاں اے، ݙوجھے پاسے بی بی سی دی ڈاکومنٹری بھارت دے وݙی جمہوریت ہووݨ دے دعوے کوں بے نقاب کر ݙتے، پاکستان امن دا علمبردار اے۔ انہاں آکھیے پاکستان گزریل چار سال اچ ترائے کثیر الجہتی کنونشنز تے دستخط کیتن جیں تے بھارت وی دستخط کیتن ، انہاں اچ پاکستان 16 جون 2022ءکوں ہیگ کنونشن، 4 مارچ 2022ءکوں کنونشن آن دی پروٹیکشن اینڈ پروموشن آف دی ڈائیورسٹی آف کلچرل ایکسپریشن 2005 اتے آئی ٹی پی پروٹوکول 2000 تے 4 نومبر 2022ءکوں دستخط کیتے ڳئے جݙاں جو بھارت وی انہاں کنونشنز تے دستخط کیتن۔
