باکو۔14نومبر(اے پی پی) وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے ماحولیاتی تبدیلی پاکستان سانڳے وݙا چیلنج اے ، گلوبل وارمنگ پاروں ساوݨ دے مینھ ، چھل تے گلیشیئر پگھلݨ نال ساݙی آبادیاں تے منفی اثرات پوندے پئن ، لوک بے گھر تھیندے پئن ، فصلاں دا ضیان تھیندا پئے ، ترقی پذیر ملکاں کوں ماحولیاتی تبدیلی نال نبݨݨ سانڳے تعاون دے وعدے پورے کیتن ونڄن ۔کوپ 29 دے موقع تے پاکستان پویلین دے دورے تے ڳالھ مہاڑ کریندے وفاقی وزیر اطلاعات آکھیے زہریلی گیساں خارج تھیوݨ اچ پاکستان دا حصہ ھک فیصد توں وی گھٹ اے 0.5 فیصد اے، ٻئے ملکاں دا زہریلی گیساں دے اخراج اچ حصہ زیادہ اے جݙاں جو ساریں توں ودھ خمیازہ پاکستان بھوڳیندا پئے ، پاکستان پویلین اچ عالمی برادری تے زور ݙتا ڳئے جو پیرس ایگریمنٹ، کوپ 27 اتے کوپ 28 اچ کیتے ڳئے وعدے پورے کیتے ونڄن ۔ انھاں آکھیے ماحولیاتی تبدیلی دے عالمی چیلنج نال نبݨݨ سانڳے سانجھیاں کوششاں دی لوڑھ اے ۔ وفاقی وزیر آکھیے چھل توں پاکستان دا ارباں ڈالر دا ضیان تھئے ۔ ماحولیاتی تبدیلی پاروں آندیاں نسلاں دے مستقبل کوں خطرہ اے۔ انہاں آکھیے پاکستان پویلین ساریں توں زیادہ متحرک پویلین اے، لوک اتھاں آندے پئن ، انہاں کوں پاکستان اچ موسمیاتی تبدیلی دے ضیان دی آگاہی ݙتی ویندی پئی اے ۔ ھک سوال دے جواب اچ وفاقی وزیر اطلاعات آکھیے موسمیاتی تبدیلی نال نبݨݨ سانڳے ہر ملک دی فنانس سٹریٹجی ہووݨی چاہیدی اے ایں توں ٻہوں بہتری آسڳدی اے ۔ ایں توں ڈونر ایجنسی یا ترقی یافتہ ملکاں کوں وی مدد ملسی او پہلے توں موجود سٹرکچر دے تحت فنڈنگ کرسڳسن اساں آپݨے لوکاں تے کلچر دے تحفظ اتے لوکاں کوں بے گھر تھیوݨ توں بچاوݨ سانڳے اقدامات چایندے پیوں تے احساس ݙویندے پیوں جو ماحولیاتی تبدیلی توں تھیوݨ آلے ضیان اساں آپݨے لوکاں تئیں نہ پجݨ ݙیسوں۔ عطاء اللہ تارڑ آکھیے آندے ویلھے اچ ماحولیاتی تبدیلی ساریں توں وݙا چیلنج اے جیں توں لوکاں دی جان و مال کوں خطرہ اے ایں سانڳے جتنا کم کیتا ونڄ ے گھٹ اے ۔ ایں موقع تے وفاقی وزیر اطلاعات پاکستان پویلین اچ بلوچستان دے ضلع حب توں تعلق رکھݨ آلی ٻالڑی زنیرہ دے سٹال تے ڳئن تے زنیرہ نال ڳالھ مہاڑ کیتی ۔ وفاقی وزیر اطلاعات آکھیے بلوچستان نال تعلق رکھݨ آلی ٻالڑی زنیرہ پاکستان دی آواز اے جیں اتھاں موسمیاتی تبدیلی دے چھوہریں دی تعلیم تے پووݨ آلے اثرات تے آواز چاتی اے اساکوں زنیرہ جیھاں ٻالڑیاں تے ماݨ اے ، زنیرہ یو این پالیسی پیپر اچ وی حصہ پاتے ، بلوچستان دیاں ٻالڑیاں تے تعلیم یافتہ تریمتاں کوں حکومت دی بھرپور حمایت حاصل ہوسی، بلوچستان دی باشعور تریمتاں پاکستان دی ترقی اچ اہم کردار نبھیندیاں پئن پاکستانی ٻالڑی زنیرہ گلوبل کاز سانڳے جتنا کم کیتے ایندی جتنی تعریف کیتی ونڄے گھٹ اے اساکوں ایں تے ماݨ اے ۔ انھاں آکھیے پاکستانی ٻالڑیاں دا مستقبل روشن اے، زنیرہ جیھاں ٻالڑیاں پاکستان دا پوری دنیا اچ ناں روشن کریسن ۔ وفاقی وزیر اطلاعات پاکستان پویلین دے مختلف سٹالز دا دورہ وی کیتا۔
