ہوائی اݙیں، بندرگاہواں تے زمینی سرحدی داخلی راستیں تے سکیننگ تے منکی پاکس توں متاثرہ لوکاں سانڳے قرنطینہ سینٹرز دا قیام یقینی بݨایا ونڄے ، وزیراعظم شہباز شریف
Prime Minister Muhammad Shehbaz Sharif chairs a review meeting regarding Monkey Pox, in Islamabad on September 13, 2024.
اسلام آباد۔13ستمبر(اے پی پی) وزیرِ اعظم محمد شہباز شریف منکی پاکس توں بچݨ دیاں ساریاں احتیاطی تدابیر اپناوݨ دی ہدایت کریندے آکھیے عوام کوں ایں سانڳے آگاہی ݙتی ونڄے ۔ ہوائی اݙیں، بندرگاہواں تے زمینی سرحدی داخلی راستیں تے سکیننگ تے منکی پاکس توں متاثرہ لوکاں سانڳے قرنطینہ سینٹرز دا قیام یقینی بݨایا ونڄے ۔ وزیراعظم آفس دے پریس ونگ توں جاری بیان موجب وزیراعظم محمد شہباز شریف دی صدارت اچ منکی پاکس دی صورتحال تے جائزہ اجلاس تھئے۔ وزیراعظم آکھیے منکی پاکس توں بچݨ سانڳے ساری احتیاط ورتی ونڄے ، عوام کوں منکی پاکس توں بچݨ دی احتیاطی تدابیر دی آگاہی ݙتی ونڄے۔ ہوائی اݙیں بندرگاہواں اتے زمینی سرحدی داخلی راستیں تے سکیننگ یقینی بݨائی ونڄے ، اللہ دے فضل و کرم نال پاکستان کوں فی الحال منکی پاکس دے حوالے نال کہیں قسم دی ہنگامی صورتحال دا سامݨا کائنی۔ وزیراعظم ہدایت کیتی جو سارے ادارے خاص کر وزارت صحت، این ڈی ایم اے منکی پاکس سانڳے آپݨی تیاری مکمل رکھن۔ منکی پاکس توں متاثرہ لوکاں سانڳے قرنطینہ سینٹرز دا قیام یقینی بݨایا ونڄے ۔ اجلاس کوں منکی پاکس دی اڄوکی صورتحال دا ݙسیا ڳئے ۔اجلاس اچ بریفنگ دے دوران ݙسایا ڳئے جو براعظم افریقہ ایں ویلھے منکی پاکس توں ساریں توں ودھ متاثر اے ، پاکستان اچ متاثرہ لوکاں اچوں منکی پاکس دی کلیڈ ٹو قسم پاتی ڳئی اے جیڑھے جو گھٹ خطرناک اے، پاکستان اچ 14 اگست توں ہݨ تئیں صرف 5 مریضاں اچ ایندی تشخیص تھئی اے۔ بریفنگ اچ ݙسیا ڳئے منکی پاکس دے متاثرہ لوکاں اچوں ٻاہرلے ملک توں پاکستان آوݨ دے بعد ایں مرض دی تشخیص تھئی ، منکی پاکس دی صورتحال تے روزانہ جائزہ اجلاس این سی او سی اچ تھیندا پئے، وزارت خارجہ صورتحال دے حوالے نال پاکستانی سفارتخانیں نال رابطے وچ اے ، منکی پاکس دے حوالے نال حکام دی ٹریننگ کیتی ڳئی اے ۔ بریفنگ اچ اے وی ݙسیا ڳئے جو صوبیں کوں منکی پاکس دی ٹیسٹنگ کٹس اتے ٻیا سامان مل گھن تے سٹاک کرݨ دی ہدایت کیتی ڳئی اے ، منکی پاکس سانڳے اقوم متحدہ دے اداریں تے شراکتی اداریں نال مشاورت جاری اے، منکی پاکس دے حوالے نال ملک گیر ہیلپ لائن 1166 کوں فعال کرݙتا ڳئے ، عوام دی آگاہی سانڳے این آئی ایچ، وزارت صحت اتے میڈیا تے منکی پاکس دی معلومات ݙتیاں ویندیاں پئن ، چارے صوبیں دے وݙے شہراں اچ قرنطینہ سینٹرز بݨائے ڳئن ، پاکستان اچ ہݨ تئیں 6 لکھ لوکاں دی سکریننگ کیتی ڳئی اے۔ اجلاس اچ چارے صوبیں دے چیف سیکرٹریز بشمول گلگت بلتستان اتے آزاد کشمیر دے سیکرٹریز وی بریفنگ ݙتی۔اجلاس اچ وزیراعظم دے کوآرڈینیٹر صحت مختار احمد بھرتھ، چیئرمین این ڈی ایم اے لیفٹیننٹ جنرل انعام حیدر ملک اتے متعلقہ اعلیٰ حکام دے نال نال صوبائی چیف سیکرٹریز وی شرکت کیتی
